السلام عليكم
طازجة لكم كما هي
يا هيه ياللي على درب الهجر ماشي
ارفق ترى بعد هجرك حالتي حالة
لو تعرف الضيقة اللي داهمت جاشي
ما كان حبل المودة تقطع وصاله
منزلك بين العيون وبين الأرماشي
باقي ومسكان غيرك عنده محالة
الجفن لجلك لحاف وعينه فراشي
يا كم مزيون هذي ما تهياله
يوم أذكر الحال قبلك كنت بطاشي
بنك المحبين ما تاجرت برياله
واسمع قصيدة عيون ضرب رشاشي
وأقول شاعر نسج قصة على باله
لكن من بعد شوفك لفني غاشي
رصاصتك طايشة للقلب قتاله
ثم صار معنى القصيدة لمعة فلاشي
وضح لي الصورة وغنيت مواله
يأم القوام المخصر عودك نشاشي
لعل ما يكسره كثرت تمياله
الخد لونه يشابه قطعة الشاشي
ضماد كل الجروح اللي تشكاله
الدر في مبسمك و الشفة هشاشي
وردية اللون فيها للعسل آلة
والجيد منتوق عن كتفه بينحاشي
ينساب فوقه جديل فوق سلساله
والنحر توه على سطح الصدر ناشي
تفاحتين تنادي من ورى الشالة
يا ما تلقيتني مع درب مغباشي
حتى المسا وقت معوادي تحراله
واليوم جسم الصداقة صابه رعاشي
يكفيه من ثورة الأيام ما ناله
بعد الطواري دخل في قسم الأنعاشي
زاد المرض ثم في قلبه تحماله
وكشف النتيجة بسرعة جابه الواشي
يبغى له الموت فال الله ولا فاله
اللي لزلات غيره دوم منقاشي
لعل في قاعة النيران مقياله
ترى الدواء في يدينك يكفي طياشي
ارجع لصوب المريض وحسن أحواله
وأن كان للحين في درب الهجر ماشي
جعل المنية تجيه ويدفن اللالة
منصورالمطيري